EMERSON AKARIBISHWA CHELSEA

Chelsea mpaka sasa ina upungufu mkubwa kwa nafasi ya ulinzi wa kushoto ambapo mara baada ya kuruhusiwa kuondoka kwa Kennedy ambaye ametimkia Newcastle kwa mkopo na Baba Rahman ambaye mwenyewe amekamilisha uhamisho wa kujiunga na Schalke 04 ambapo atakuwa uko kwa miezi 18 ambayo ni sawa na mwaka mmoja na nusu.

Kuondoka kwa walinzi hao, inamaanisha Chelsea sasa ina mlinzi mmoja tu kwa nafasi hiyo ya mlinzi wa kushoto ambaye ni Marcos Alonso, na kama ikitokea mchezaji huyo akaumia au kupata adhabu basi Chelsea itapata tabu kumpata mbadala wa nafasi hiyo ambapo mara kadhaa alipokuwa akikosekana Victor Moses amekuwa akitumika kucheza kwa nafasi hiyo ambapo amekuwa akionekana haimudu kisawasawa maana kiasili ni mchezaji wa upande wa kulia.

Cesar Azpilicueta amekuwa akitumika kama mlinzi wa kati anayesogea kidogo upande wa kulia na amekuwa akitumika pia kwa nafasi hii ingawa bado hajakuwa bora kucheza kwa nafasi hiyo.

Kwa maana hiyo, hii inamaanisha kukaribishwa kwa nyota kutoka klabuni As Roma, Emerson Palmieri ambaye yeye amekuwa akitajwa kutakiwa na Chelsea huku kukiwa na taarifa kuwa mahitaji binafsi ya mchezaji huyo tayari yashafikiwa na kilichobaki ni klabu tu ya As Roma kukubaliana dau na Chelsea.

Na kama una kumbukumbu vyema, kocha Antonio Conte aliwai kuhojiwa juu ya Chelsea kumtoa mchezaji iwe kwa mkopo au kwa kuondoka kabisa ambapo kocha Conte alijibu akisema hakuna mchezaji atakayeondoka bila kupatikana mbadala wake.

Kwa maana hiyo, kuondoka kwa Baba Rahman na Kennedy inamaanisha kunafungua milango rasmi kwa raia huyo wa Italia mwenye asili ya Brazil, Emerson Palmieri kutua klabuni Chelsea huku dirisha dogo likiwa linafungwa kesho kutwa siku ya jumatano tarehe 31-Januari.