Kocha wa Liver ajaribu kuivunja kauli ya Antonio Conte

Katika mikutano mingi ya kocha Antonio Conte klabuni Chelsea aliyoifanya pamoja na waandishi wa habari amekua akisisitiza juu ya Chelsea kutojaribu kuwauza nyota wake klabuni hapo haswa alipokua anaulizwa kuhusu Hazard na Thibaut Courtois kutakiwa na klabu ya Real Madrid.

Moja ya magazeti ya nchini Italia yamechapisha habari ikisema klabu ya Liverpool ya nchini Uingereza pamoja na klabu ya Real Madrid ya nchini Hispania zote zinawania saini ya mlinda mlango wa Chelsea, Thibaut Courtois ambapo hii ni kama kujaribu kuivunja kauli ya Conte kama Chelsea ikikubali kumuuza nyota huyo raia wa Ubelgiji.

Liverpool wanadaiwa kumsaka mlinda mlango mpya mara baada ya mlinda mlango wake, Karius kufanya makosa yaliyoigharimu klabu yake kushindwa kutwaa taji la klabu bingwa barani Ulaya ikipokea kichapo cha magoli 3-1 katika mchezo wa fainali dhidi ya Real Madrid.

Kuhusu Real Madrid bado haijaeleweka licha ya gazeti hilo kuchapisha habari hiyo ikipingana na ile taarifa ya kwanza iliyodai kocha wa klabu hiyo, Zinedine Zidane ameridhishwa na ubora wa mlinda mlango nambari moja klabuni hapo anayejulikana kama Keylor Navas na hatazamii kumsajili mlinda mlango mwengine ili kuchukua mikoba ya mlinda mlango huyo raia wa Costa Rica.