Kitambo; Eden Hazard asaini rasmi Chelsea

Leo ni tarehe 04-Juni-2018 ukirudisha miaka nyuma mpaka kufikia tarehe kama ya leo mwaka 2012, klabu ya Chelsea iliyotoka kutwaa ubingwa wa klabu bingwa barani Ulaya kwa siku 16 zilizopita ilituma ujumbe kupitia mtandao wake ikitoa taarifa juu ya kukamilisha rasmi usajili wa nyota raia wa Ubelgiji, Eden Hazard ambaye alisajiliwa na Chelsea akitokea klabu ya Lille ya nchini Ufaransa.

Nyota huyo anakamilisha mwaka wa sita hii leo kwa kuwa mchezaji wa Chelsea ambapo amefanikiwa kupata mafanikio mengi makubwa tangu atue klabuni hapa.

Ligi ya Ulaya (Europa League), mataji mawili ya ligi kuu Uingereza, kombe moja la FA pamoja na taji la kwanza la kombe la ligi ni mataji aliyosaidia kwa kiasi kikubwa kupatikana kwake tangu atue Chelsea mwaka 2012 wakati Chelsea ikiwa chini ya kocha Roberto di Matteo.

Gwiji wa Chelsea, Frank Lampard aliwai kuhojiwa na kuulizwa kuhusu nyota huyu ambapo alimsifia kwa kusema anaamini nyota huyu mwenye miaka 27 kwa sasa ana uwezo wa kufanya makubwa maana dunia kaiweka miguuni mwake.

Mwaka 2015 mwezi Februari alisaini mkataba mpya wa miaka mitano na nusu ambapo hii inamaanisha mwishoni mwa msimu wa 2019-2020 atakuwa si mchezaji wa Chelsea kama hatosaini mkataba mpya maana ndio mkataba wake wa kusalia na Chelsea utakuwa unamalizika, au kama akiondoka kabla ya kipindi hiko basi ataifanya Chelsea ivune pesa nyingi kutoka kwake.