We unadhani kwanini Chelsea imefanya vibaya? Msikie Deco akieleza sababu zake

Wote tunajua kwamba nafasi ya tano ya ligi kuu Uingereza ambayo Chelsea imemaliza msimu huu inamnyima nafasi au tiketi ya kushiriki ligi ya mabingwa barani Ulaya kwa msimu ujao. Hiyo haikuwa kwenye mipango ya klabu hiyo toka kuanza kwa msimu huu wa 2017-2018, ukikumbushia na Chelsea kushinda kutetea taji lake la ligi kuu basi ni kama ndio unazidi kusema kwa msimu huu imefeli, licha ya kushinda taji la kombe la FA. Si haba, lakini mipango haikuwa hivyo.

Na hilo kaliona pia mchezaji wa zamani wa Chelsea ambaye ni raia wa Ureno ingawa ana uasili au chembechembe za kibrazil kutokana na kuzaliwa nchini Brazil, Deco.

Gwiji huyo anaamini sababu kubwa ya Chelsea kushindwa kufanya vizuri msimu huu ni pale kocha wake, Antonio Conte aliposhindwa kuyaweka sawa na kumaliza tofauti zake na mshambuliaji wa machachari aliyekuwepo klabuni hapo, Diego Costa mpaka kusababisha nyota huyo kulazimisha usajili wa kurejea Atletico Madrid ambako Chelsea walimsajili.

Kupitia moja ya mahojiano aliyofanyiwa nyota huyo wa zamani aliyetamba na jezi yake ya namba 20 mgongoni alisema Chelsea ilifanya makosa kumruhusu Nemanja Matic kuondoka kikosini ingawa kuondoka kwake hakujasababisha madhara makubwa kama madhara yaliyotokea kwa kuondoka kwa Diego Costa na hata mchezaji aliyeletwa ili kuziba pengo lake, Alvaro Morata ameshindwa kutimiza yale yaliyofanywa na Costa aliyeisaidia Chelsea kutwaa ligi kuu Uingereza kwa msimu wa kwanza kwa kocha Antonio Conte kikosini.

Deco anaamini Conte alipaswa kukaa chini na Diego Costa ili kuzimaliza tofauti zao ambazo chanzo kikubwa kilikuwa utovu wa nidhamu wa mshambuliaji huyo raia wa Hispania na sio kuamua kumtumia ujumbe kwa njia ya simu na kumwambia hamhitaji klabuni hapo.