BARKLEY NJE, BATSHUAYI NDANI vs NORWICH

Kocha wa Chelsea, Antonio Conte leo amefanya mkutano na waandishi wa habari kuelekea mchezo wa kesho ambapo Chelsea itakuwa Darajani kumenyana dhidi ya Norwich katika kombe la FA mchezo wa marudiano kwa raindi ya tatu. Kuelekea mchezo huo kocha Antonio Conte ametoa taarifa kadhaa kuhusu mchezo huo ambapo kama Chelsea ikipata ushindi basi itamenyana dhidi ya Newcastle united iliyochini ya kocha wa Chelsea wa zamani, Rafa Benitez.

Barkley ambaye ni nyota mpya kikosini Chelsea ambaye alisajiliwa akiwa na majeruhi akitokea klabuni Everton, tayari ameshaanza mazoezi pamoja na timu na kocha amesema anafurahia maendeleo ya nyota huyo lakini kwa mchezo wa kesho hatocheza.

"Amekuwa na mwendelezo mzuri, nimependa na nafurahia maendeleo yake, lakini kwa kesho bado hatocheza, nitahitaji uandaliwe mchezo wa kirafiki ili kumpima kama tayari ameshapona kabisa na kuwa sawa kisha niwe na uhakika. Anaweza kuwepo kwenye mchezo dhidi ya Brighton" alisema Antonio Conte.

Lakini pia hakusita kumwelezea nyota Michy Batshuayi ambaye amekuwa akihusishwa kutolewa kwa mkopo ama kuuzwa kabisa kama je naye kesho atapewa nafasi au bado Hazard ataendelea kutumika kama mshambuliaji wa kati.

"Michy ni mchezaji wa Chelsea, na anastahili kuichezea Chelsea. Kesho atakuwa na nafasi ya kucheza ili kunionyesha kama anastahili kuwepo klabuni. Sio kwa faida yangu ni kwa faida ya timu" alisema Conte.

Lakini pia kwa upande wa nahodha mkuu, Gary Cahill yeye ataukosa mchezo huo kutokana na kupata majeraha katika mchezo dhidi ya Leicester ingawa kocha amesema hana majeraha makubwa wakati kwa Cesc Fabregas naye atakuwa nje kutokana na majeraha.