GIROUD KUTUMIKA MCHEZO DHIDI YA WEST BROM

Chelsea inaweza kumtumia mshambuliaji wake mpya raia wa Ufaransa, Olivier Giroud katika mchezo unaofata ambapo Chelsea itakuwa uwanjani kucheza mchezo wake wa raundi ya 27 ya ligi kuu Uingereza dhidi ya West Bromwich siku ya jumatatu.

Chelsea itaendelea kumkosa mshambuliaji wake namba moja, Alvaro Morata ambaye bado anauguza majeraha yake ya mgongo yanayomfanya kukosa michezo mingi huku kocha Antonio Conte akikiri hana uhakika nyota huyo atachukua muda gani kurejea uwanjani na hivyo kumfanya Olivier Giroud kuwa namba tisa wa asili peke yake kikosini, labda akisaidiwa na kinda Callum Hudson-Odoi.

Olivier Giroud anatajwa kutumika kama chaguo la kwanza katika mchezo huo ambapo mara nyingi amekuwa akitumika Eden Hazard kama namba tisa ingawa sio nafasi yake kiasili haswa pale Alvaro Morata alipokuwa nje au kocha kuamua kumtumia kwenye nafasi hiyo.