KINDA WA WATFORD, ATOA NENO KUTAKIWA NA CHELSEA

Chelsea imekuwa ikitajwa kumfukuzia winga wa klabu ya Watford, Richarlison ambaye ni raia wa Brazil. Kumfukuzia nyota huyo mwenye miaka 20 kulianzia nchini Brazil ambapo Chelsea ilipeleka ofa ya kumsajili kinda huyo aliyekuwa akiichezea klabu ya Fluminense kabla ya Chelsea kuzidiwa kete na Watford waliomnasa kwenye dirisha kubwa la mwezi Agosti mwaka jana.

Lakini licha ya kinda huyo kujiunga na wababe hao, bado Chelsea inaungana na klabu nyengine kuendelea kumtamani kinda huyo ambaye mara kadhaa amekuwa akikiri kuwa ana mahusiano mazuri na wachezaji wa Chelsea ambao ni raia wa Brazil kama yeye, ambao aliwataja David Luiz na Willian kuwa ni watu wake wa karibu.

Nyota huyo alipohojiwa juu ya kutakiwa na Chelsea alisema, "Sijui kwa baadae ni nini kitatokea, maana hilo nawaachia mawakala wangu, wao ndio wanajua ni kipi kitaendelea. Lakini kwa sasa akili yangu inawaza kuhusu Watford, ni vipi nitaweza kuisaidia klabu yangu, na ni vipi nitaweza kuifanya ifanikiwe." alisema Richarlison.

Nyota huyo alisaini Watford mkataba wa miaka mitano huku akipokea mshahara wa paundi 20,000 kwa wiki (Shilingi za Tanzania, milioni 63 kwa wiki) na inaelezwa kuwa Watford wapo kwenye mipango ya kutaka kufanya nae mazungumzo ili asaini mkataba mpya.