Thomas Tuchel kumrithi Antonio Conte, kwa sharti moja

Kocha wa Chelsea, Antonio Conte haonekani kuwa na maisha marefu klabuni Chelsea, magazeti na vyombo vingi vya habari vinaeleza kuwa mwisho wa msimu huu utakuwa ndio msimu wa kocha huyo kuendelea kuwa kocha wa Chelsea.

Mara baada ya fununu hizo kuwepo, kuna makocha wengi wanatajwa kuwaniwa na klabu ya Chelsea ili kuziba pengo la kocha huyo kama ikitokea akaondoka klabuni hapo.

Moja ya makocha wanaotajwa ni pamoja na kocha wa zamani wa Borrusia Dortmund, Thomas Tuchel ambaye anatajwa kutakiwa na Chelsea lakini pia klabu za Arsenal na PSG zinatajwa kumfukuzia kocha huyo.

Lakini gwiji wa Chelsea, Michael Ballack anaamini kocha huyo anaweza kutua Chelsea kwa sharti moja tu.

"Kiuhakika atajiunga (Thomas Tuchel) na klabu yenye hadhi kubwa. Anaweza akajiunga na Chelsea au timu yoyote. Lakini kujiunga na Chelsea itategemea tu kama Chelsea itafudhu kucheza klabu bingwa" alisema nyota huyo raia wa Ujerumani.