Hazard atoa neno juu ya mwenendo wa Chelsea

Chelsea imekuwa na msimu mgumu ikionekana kushindwa kutetea taji lake la ligi kuu Uingereza ililoshinda msimu uliopita ikiwa chini ya kocha Antonio Conte.

Lakini pia jana ilishindwa kupata ushindi muhimu dhidi ya West Ham ambapo mchezo huo uliisha kwa sare ya 1-1 huku goli la Chelsea likifungwa na mlinzi Cesar Azpilicueta. Mara baada ya mchezo huo ulioisha kwa sare hiyo, winga wa Chelsea, Eden Hazard ametoa neno juu ya nini anakiona klabuni Chelsea kwa sasa.

"Kama ukiuangalia vizuri ule mchezo, tulicheza kwa kila hari haswa katika kipindi cha kwanza"

"Msimu huu haupo vizuri kwetu, tumefanya makosa na kuruhusu magoli. Lakini pia tunapopata nafasi ya kufunga tunashindwa kulitimiza hilo, na hivyo ndivyo ilivyotokea na kufanya mchezo kuisha kwa sare ya 1-1 na wote tulihuzunishwa"

"Inatakiwa tujumuike pamoja. Kuna michezo sita imebaki katika ligi kuu na tutajitahidi kivyovyote kuingia kwenye timu nne za juu mwishoni mwa msimu" alisema Hazard