Kocha Conte atoa majibu kuhusu Drinkwater na Courtois

Chelsea inajiandaa kucheza mchezo wake wa ligi kuu Uingereza hapo kesho dhidi ya Southampton, mchezo ambao Chelsea itataka kupambana ili kufanikiwa kuzipata alama tatu zitakazoweza kufufua matumaini mapya kwenye harakati zake za kupambania nafasi ya kucheza klabu bingwa Ulaya kwa msimu ujao.

Kuelekea kwenye mchezo huo, kocha Antonio Conte amefanya mkutano na waandishi wa habari akiulizwa mambo mengi juu ya mchezo huo muhimu kwa Chelsea.

Moja kati ya mambo aliyoulizwa ni pamoja na vuguvugu linaloendelea chini kwa chini klabuni hapo juu ya kiungo wa Chelsea, Danny Drinkwater ambaye anatajwa kuchoshwa na maisha ya Chelsea na kudaiwa anatamani kuondoka.

"Tunamzungumzia mchezaji mzuri, ila amekuwa na msimu mbaya kutokana na majeraha aliyoyapata na kumfanya akae nje. Ni mchezaji bora, nami namuamini" alisema kocha huyo.

Lakini pia alipoulizwa juu ya Thibaut Courtois kutakiwa na baadhi ya vilabu barani Ulaya, kocha huyo alijibu akisema "Hili swali nimeshaulizwa sana, na nimeshalitolea majibu sana. Nadhani tunamzungumzia mlinda mlango bora na mwenye uwezo mkubwa. Yaliyobaki ni yeye na klabu" alisema kocha huyo.