Kujiandaa kwa Chelsea vs West Ham, Hazard awashangaza wengi

Chelsea inajiandaa kucheza mchezo wake mwengine wa ligi kuu Uingereza dhidi ya West Ham jumapili hii mara baada ya kupoteza mchezo wake uliopita ikiwa Darajani dhidi ya Tottenham, jumapili iliyopita.

Lakini kuelekea kwenye mchezo huo, Chelsea imekuwa mazoezini kujinoa kabla ya kushuka tena Darajani kucheza na klabu hiyo ambayo nayo inatokea jiji moja na inapotokea Chelsea, London. Lakini katika kujiandaa katika mazoezi hayo, kuna tukio limetokea ambalo limevuta hisia za wengi kwenye mitandao mbalimbali ambapo mashabiki wa soka wengi wameonekana kuliongelea.

Unajua ni tukio gani? Ni kujumuishwa jina la winga Kylian Hazard ambaye ni mdogo wa nyota wa klabu hiyo, Eden Hazard kwenye mazoezi ya kikosi cha wakubwa ambapo kinajiandaa kumenyana dhidi ya West Ham.

Kujumuishwa kwa Kylian kwenye mazoezi ya Chelsea akitokea kikosi cha vijana cha Chelsea kumezua maneno huku wengi wakifurahia kumuona kinda huyo mwenye miaka 22 kwa sasa akicheza sambamba na kaka yake Eden Hazard.

Kylian Hazard amekuwa akihusishwa mara kadhaa kutaka kuondoka klabuni hapo mara baada ya kuona ana nafasi finyu ya kuitumikia timu hiyo na badala yake akitaka kuungana na klabu itakayompa nafasi ya kucheza zaidi, hilo liliwai kuthibitishwa hata na baba yake, Mzee Thierry Hazard.