Wabrazil watoa taarifa mbaya kwa mashabiki wa Chelsea

Chombo cha habari kinachoaminika cha nchini Brazil kimetoa taarifa zinazohusu usajili wa nyota na kiungo wa Chelsea, N'Golo Kante ambaye amekuwa akihusishwa kutakiwa na klabu ya PSG ya nchini Ufaransa.

Chombo hicho cha habari kinadai klabu ya PSG inamtazama kiungo huyo mwenye miaka 27 kwa sasa kama chaguo lao la kwanza, ikimhitaji nyota huyo ili akazibe pengo la kiungo Thiago Motta ambaye umri wake unamtupa mkono kwenye soka la kasi na la kiushindani.

Klabu hiyo inatajwa kumfukuzia nyota huyo ambaye aliwai kuulizwa juu ya kutakiwa kwake na baadhi ya vilabu barani Ulaya na nyota huyo kujibu akisema amepokea taarifa za kutakiwa na klabu ya Olympique Marseille lakini akasema kwa sasa anafikiria na kuona lipi sahihi kulifanya.

N'Golo Kante alisajiliwa na Chelsea akitokea Leicester city, na tangu alipotua Chelsea ameshashinda taji la ligi kuu Uingereza mara moja huku tunzo zake mwenyewe akishinda kwa  idadi kubwa.