Klabu ya Uingereza yawafukuzia nyota wawili kutoka Chelsea

Klabu ya Blackburn Rovers ambayo imepanda daraja msimu huu ikitoka ligi daraja la pili nchini Uingereza ambalo huko wanaliita League One na kupanda mpaka ligi daraja la kwanza maarufu kama Championship inatajwa kufukuzia saini za nyota wawili kutoka klabuni Chelsea lakini kwa mkopo.

Michael Hector pamoja na Trevoh Chalobah wote wanatajwa kufukuziwa na klabu hiyo.

Michael Hector ambaye msimu uliopita aliutumia akiwa anaichezea kwa mkopo klabu ya Hull city alisajiliwa na Chelsea akitokea Reading amebakiza mkataba wa miaka miwili na anaweza akajiunga na klabu hiyo inayopambana kutokushuka tena daraja. Jambo ambalo labda litakushangaza kuhusu nyota huyu mwenye uwezo wa kucheza kama mlinzi na kiungo mpaka sasa akiwa na miaka 25 ameshazichezea klabu 14 toka alipoanzia soka lake la ushindani huko Reading.

Lakini pia klabu hiyo inatajwa kumfukuzia mdogo wa kiungo wa zamani wa Chelsea ambaye kwa sasa ni mchezaji wa klabu ya Watford Nathaniel Chalobah, kinda Trevoh Chalobah ambaye bado hajatimiza miaka 19 kwa sasa akiwa na miaka 18 lakini amekuwa na msimu na maisha mazuri klabuni Chelsea na tayari ameshahusika kwenye kikosi cha timu ya kwanza ya Chelsea ingawa hakupata nafasi ya kucheza akiwa chini ya kocha Antonio Conte. Chelsea inaweza kumtoa kwa mkopo ili akapate ujuzi zaidi kuhusu soka la ushindani.