Laurent Blanc, Zinedine Zidane nani kutua Chelsea?

Klabu ya Chelsea inatajwa kwa karibu kumfukuzia kocha wa zamani wa timu ya taifa ya Ufaransa na alishawai kuifundisha klabu ya PSG, Laurent Blanc ambaye kwa sasa hana timu anayoifundisha.

Uhamisho wa Blanc kutua Chelsea unategemea kama Chelsea itakosa nafasi ya kumsajili kocha wa zamani wa Real Madrid, Zinedine Zidane ambaye ametoka kuishangaza dunia ya soka kwa kuamua kwa hiyari kuachana na kibarua cha kuifundisha klabu hiyo ambayo imetoka kushinda taji la klabu bingwa Ulaya kwa mara tatu mfululizo.

Zidane anatajwa pia kupokea ofa nono kutoka nchini Qatar huku Chelsea ikimfukuzia kama mrithi wa kocha Antonio Conte ambaye anatajwa kuondoka licha ya kubakiza mkataba wa mwaka mmoja.

Laurent Blanc na Zinedine Zidane walishawai kucheza pamoja kama wachezaji kwenye kikosi cha timu ya taifa ya Ufaransa kwenye michuano ya kombe la dunia kwa mwaka 1998.