Ametwaa tunzo ya mchezaji bora wa mwaka inayotolewa kwa wachezaji wa kulipwa kwa upande wa wanawake maarufu kama PFA Women Player of the Year, akatwaa tena tunzo nyengine ya mchezaji bora wa mwaka kwa upande wa klabu ya wanawake zilizotolewa kwenye usiku wa tunzo za Chelsea lakini pia akashinda tunzo nyengine kwenye usiku huohuo wa tunzo za Chelsea akishinda tunzo ya mchezaji bora kwa kura zilizopigwa na wachezaji wenzake lakini kama hiyo haitoshi akachaguliwa mchezaji bora kwa klabu ya wanawake ya Chelsea FC Women ambayo zamani ilitambulika kama Chelsea Ladies akishinda tunzo ya mchezaji bora kwa mashabiki na wapenzi wa klabu hiyo yenye makazi yake pale Kingsmeadow jijini London.
Ni Fran Kirby amefanikiwa kusaini mkataba mpya utakaomfanya asalie klabuni Chelsea FC Women mpaka mwaka 2021.
Ameiongoza vyema klabu hiyo katika michuano iliyoshiriki kwa msimu mzima ambapo imefanikiwa kushinda taji la ligi kuu kwa wanawake nchini Uingereza maarufu kama FA WSL yaani Football Association Women Super League lakini pia akiiongoza kushinda taji jengine la kombe la FA kwa wanawake (SSE) lakini pia akiisaidia klabu hiyo kufika nusu fainali kwa mara ya kwanza kwenye michuano ya klabu bingwa barani Ulaya kwa upande wa wanawake.
Mara baada ya kusaini mkataba huo mchana wa leo amesema anafuraha ya kusalia klabuni hapo na anasubiri kwa hamu kuanza kwa msimu mpya huku akisema kuwa klabuni hapo ni kama kwenye familia yake na anatamani kusalia klabuni hapo kwa muda zaidi.
Habari, jina langu ni Barnabas Gwakisa ni kijana raia wa Tanzania ninayeshabikia klabu ya Chelsea na ninakuletea ukurasa huu ili upate habari zote kuhusu Chelsea FC, Chelsea FC Women (kwa wanawake) na Chelsea Youth (kwa vijana wa akademi), Asante,....
No comments:
Post a Comment