Chelsea kwenye vita ya kumnasa shujaa wa Madrid

Klabu ya Chelsea imeingia vitani ili kupambania saini ya nyota raia wa Wales ambaye aliisaidia klabu yake ya Real Madrid kutwaa taji pekee kwa msimu huu kwa klabu hiyo, taji la klabu bingwa barani Ulaya maarufu kana Uefa Champions League.

Gareth Bale ambaye aliingia kama mchezaji wa akiba kwenye mchezo huo ilimchukua dakika tatu tu kuifanya klabu yake kuwa mbele kwa magoli 2-1 kabla ya dakika kadhaa baadae kupiga shuti kali lililompagawisha mlinda mlango wa Liverpool na kuifanya klabu yake kuondoka na ushindi wa magoli 3-1. Na kuipatia klabu hiyo ubingwa wa michuano hiyo kwa mara ya tatu mfululizo.

Nyota huyo anatajwa kuziingiza klabu vigogo barani Ulaya kwenye vita ya kupambania saini yake huku mwenyewe akitaka kuondoka klabuni hapo na kutafuta klabu mpya itakayomtumia kama chaguo la kwanza.

Chelsea imeingia vitani kupambana dhidi ya Manchester united, Bayern Munich pamoja na PSG ya Ufaransa ambao wote wanatamani nyota huyo avae jezi zao kuanzia msimu ujao.