Chelsea yapagawishwa na nyota wake klabuni Vittese

Uongozi wa klabu ya Chelsea umempa taarifa nyota wa klabu hiyo anayeichezea kwa mkopo klabu ya Vittese ya nchini Uholanzi, Mason Mount ambaye kwenye mchezo uliopita aliiongoza klabu yake kuondoka na ushindi wa magoli 5-1 dhidi ya Ado Den Haag huku mwenyewe akifunga magoli matatu na kutengeneza jengine moja.

Klabu ya Chelsea imempa nyota huyo mwenye miaka 19 taarifa ya kuungana na kikosi cha Chelsea kwenye michezo ya kirafiki itakayocheza klabu hiyo mara baada ya msimu huu kuisha.

Klabu hiyo inafikiria pia kumtoa kwa mkopo tena nyota huyo ili ajiunge na klabu itakayompa muda na nafasi kubwa ya kuwepo kwenye kikosi cha kwanza ili kama akirejea klabuni Chelsea basi awe na uzoefu wa kiasi kikubwa.

Nyota huyo anatajwa kuwapagawisha viongozi wa Chelsea haswa bodi ya usajili ambayo imeanza kupokea ofa kibao kutoka kwenye klabu kadhaa barani Ulaya zikiwemo zile vigogo nchini Uholanzi ilipo klabu yake ya Vittesse, klabu za PSV na Ajax ambazo zinasubiri majibu kutoka kwa Chelsea. Nyota huyo pia amechaguliwa kuwa moja ya wachezaji bora klabuni Vittesse ambayo ndio klabu ya kwanza kuichezea akitokea Chelsea mwaka jana. Nyota huyo mwenye miaka 19 ni zao la akademi ya Chelsea.