Gonzalo Higuain azungumzia kutakiwa na Chelsea

Chelsea inatajwa kuhusishwa na usajili wa nyota raia wa Argentina, Gonzalo Higuain ambaye ni mshambuliaji na nyota wa klabu ya Juventus ya nchini Italia.

Chelsea inatajwa kumfukuzia nyota huyo mwenye miaka 30 na kulikuwa na taarifa kuwa klabu yake ipo tayari kumuuza kama itampata mshambuliaji atakayeziba nafasi yake huku pia kukihusishwa kutaka kufanya mabadilishano ya kumchukua Morata kutoka Chelsea na wao wamruhusu Higuain atue Chelsea.

Nyota huyo ametoa neno kuhusu kutakiwa kwake na Chelsea ambapo alipohojiwa na chombo cha habari cha ESPN alisema "Nina furaha kuendelea kubaki Juventus na napenda mwanangu aendelee kukua akiwa Turin lakini pia natamani kucheza ndani ya ligi kuu Uingereza."

Kauli hiyo imekuwa gumzo huku vyombo vya habari vikitafsiri uwezekano wa nyota huyo kukaribia kujiunga na Chelsea ambayo ilihusishwa kumtaka tangu alipokua kwenye klabu ya Napoli lakini akachagua kujiunga na Juventus mwaka 2016 kwa dau la paundi milioni 78.