Nyota wa Napoli akubali kutua Chelsea kwa sharti moja tu

Chelsea inatajwa kuwa na nafasi ya kumnasa nyota wa klabu ya Napoli, Elsaid Hysaj ambaye anacheza kama mlinzi wa kulia wa klabu hiyo endapo tu itatimiza jambo moja.

Wakala wa nyota huyo alipohojiwa na chombo kimoja cha habari juu ya nafasi ya nyota huyo kuachana na kikosi cha klabu hiyo kilichomaliza nafasi ya pili kwenye msimamo wa ligi kuu nchini Italia (Serie A) alisema "Kuna nafasi kubwa kwake kujiunga na timu za Uingereza. Lakini nafasi ya kuendelea kufanya kazi na Sarri itakuwepo endapo kocha huyo atafanya uamuzi utakaofaa"

Hii imetafsiriwa na wachambuzi wengi wa soka kwamba nafasi ya nyota huyo kujiunga na klabu ya Uingereza itategemea kama kocha wa zamani wa klabuni Napoli, Maurizio Sarri atachagua klabu ya kujiunga huku klabu ya Chelsea ikitajwa kufukuziwa.

Hysaj na Maurizio Sarri wamefanya kazi kwa miaka sita huku kwenye msimu ulioisha Sarri akimpa nyota huyo nafasi ya kucheza kwenye michezo 45 hali inayotafsiriwa kuwaweka karibu wawili hapo na kuna uwezekano mkubwa kama kocha Sarri akifanikiwa kutua Chelsea basi atatua na nyota huyo.